Talde arabarrak erreskadako hamaikagarren garaipena erdietsi du talde zuria gainditu ostean
Real Madrilen aurka garaipena lortu ostean, hilabete bikaina itxi dute Joan Peñarroyaren gizonek. Lehen zatian lortutako abantaila kudeatzeko gaitasuna izan zuten arabarrek partida 92 eta 86ko markagailuarekin bereganatzeko. 21 puntu, 5 errebote eta 26ko balorazioarekin, Rokas Giedraitis kapitaina izan zen etxeko taldearen jokalaririk nabarmenena.
Partida oso parekatua hasi zen. Chus Mateok zuzentzen duen taldeak neurketako lehen abantaila lortu zuen (8-13) baina hainbat aldaketa egin ondoren, Joan Peñarroyaren gizonek markagailua berdintzea lortu zuen lehen laurdena amaitzeko bi minuturen faltan (21-21). Lehen hamar minutuak atzetik amaitu bazituen ere (24-28), Cazoo Baskoniak markagailuari buelta emateko gaitasuna izan zuen bigarren laurdenean. Hiruko marratik sartutako hainbat saskiratzek, etxekoen aldera eraman zuen partida (45-36). Arabarren erasoko jokoak ez zuen etenik eta Markus Howarden puntuei esker, neurketako alderik handiena lortu zuen Baskoniak (57-40). Atsedenaldira alde politeko markagailuarekin iritsi zen (59-43).
Aldageletatik bueltan baina partida aldatu egin zen. Defentsan gehiago estutu zuen talde zuriak eta 4 eta 12ko partzialarekin markagailuan hurbiltzea lortu zuen. Markus Howarden gidaritzapean, arabarrak erasoan gehiago asmatzen hasi ziren baina ez zen nahikoa markagailuan aldentzeko. Azken laurdenera 73 eta 69ko markagailuarekin iritsi zen. Real Madrilek bere horretan jarraitu zuen tentsio eta emozio handiko azken minutuetan, baina beraien aldeko abantaila mantentzeko gai izan ziren Joan Peñarroyaren gizonak. Hilabete honetan jokaturiko partida guztiak irabazita, abendu bikaina burutu du talde arabarrak.
Denboraldiko momenturik onenean esango dio agur urteari Cazoo Baskoniak. 2023. urtea indartsu hasiko du talde gasteiztarrak lehen astean hiru norgehiagoka jokatuz. Lehen geldialdia Granadan izango du, Coviran Granadaren aurkako neurketan (Asteartea, 21:30). Handik Berlinera bidaiatuko du Europako erronka berri bati aurre egiteko Alba Berlinen etxean (Osteguna, 20:00). Astea, Buesa Arenan itxiko du Valentziaren aurkako jokatuko duen Glow Game-an (Igandea, 18:30).
