Datorren irailaren 29an La Laguna Teneriferen aurka jokatuko duen denboraldiko lehen neurketari begira, Saski Baskoniako 11 jokalarik azterketa medikoak gainditu dituzte atzo eta gaur Gasteizko IMQ Amarica osasun-zentroan. Pablo Lasoren gizonek, eta talde tekniko osoak, eliteko kirolariei dagozkien analisiak eta probak egin dituzte. Besteak beste, elektrokardiograma eta ekokardiograma bat eta esfortzu-proba bat, osasun-egoera eta kirol-errendimendua egiaztatzeko.
Horrela, honako jokalari hauek pasa dituzte probak: Sander Raieste, Khalifa Diop, Chima Moneke, Nikos Rogkavopoulos, Tadas Sedekerskis, Kamar Baldwin, Timothé Luwawu-Cabarrot, Trent Forrest, Donta Hall, Pavel Savkov eta Ousmane Ndiaye.
Proben garapena
Proba horietarako aurrez ezarritako ordenari dagokionez, odol-serumaren hainbat alderdi biokimiko egiaztatzeko egin den analitikaren ondoren, dagokion elektrokardiogramarekin, jokalarien atsedena baloratu da.
Hurrengo urratsa ekokardiograma bat egitea izan da (bihotzaren ekografia bat). “Azterketa gehiago egiteko aukera ematen du proba honek, bai eta miaketan eta elektrokardiograman oharkabean pasa daitezkeen kardiopatia batzuk detektatzeko ere. Horiek konplikazioak eragin ditzakete kirola egitean”, adierazi du Javier Pindadok, Baskoniako azterketa medikoez arduratu den IMQ Amarica zentro medikoko kardiologoak.
Gainera, Pindado doktoreak zehaztu duen bezala, esfortzu-ergometria bat egin dute. “Ergometriaren kasuan, ahalegina modu protokolizatuan egiten da etapa desberdinetan, eta etapa horietan presio arteriala neurtzen da eta elektrokardiograma etengabe monitorizatzen da. Kirolariak gehieneko frekuentzia kardiakoa lortzen duenean gelditzen da”. Ergometriaren helburua kirolarien bihotzeko arterien bidez fluxu arterial koronarioa ebaluatzea da, eta metodoa, esfortzuaren etapa bakoitzean elektrokardiograma basala eta elektrokardiograma alderatzea da. Bere kirol baldintzak hobetzeko eta jokalari bakoitzarentzako entrenamendua indibidualizatzeko helburuarekin, proba honek bihotzak ariketaren aurrean duen erantzuna ere aztertzen du.
IMQ, Baskoniaren aseguru mediko ofiziala
IMQ Baskoniako aseguru mediko ofiziala da 2007-2008 denboralditik. Jokalari urdin-gorriek osasun-kirol azterketa egin duten IMQ Amarica zentro medikoak punta-puntako teknologia du kirol medikuntzan, baita mediku espezialistak, Jarduera Fisikoaren eta Kirolaren Zientzietako profesionalak eta Errehabilitazioko beste batzuk ere. Gainera, IMQ irabazi-asmorik gabeko Baskonia-Alaves Fundazioko kide babeslea da.
