Cazoo Baskoniak ezin izan du talde greziarra gainditu eta Zalgirisen porrot bat behar du zortzi talderik onenen artean sailkatzeko.
Euroleagueko fase erregularreko azken partidan, talde gasteiztarra Olympiakosen kantxan erori da 86 eta 78-ko markagailuarekin. Joan Peñarroyaren gizonek 18 garaipenekin amaitu dute txapelketa eta Municheko Bayernen eta Zalgirisen arteko neurketaren zain gelditzen dira zortzi talderik onenen artean sailkatzeko. 29 puntu eta 19-ko balorazioarekin, Markus Howard izan da arabarren jokalaririk nabarmenena.
Bakearen eta Adiskidetasunaren pabiloian hasiera zaila izan du Baskoniak. Lehen puntuak Olympiakosen saskiratu ditu eta talde arabarrak arazoak izan ditu puntuak sartzeko lehen lau minutuetan. Taldearen susperraldia bilatuz, Joan Peñarroyak hutsartea eskatu du baina lehen laurdena atzetik amaitu dute gasteiztarrek (19-11). Bigarren laurdenean Markus Howardek gaineratu du protagonismoa. Hegalekoak lortutako zazpi punturi esker, Cazoo Baskonia puntu bakar batera jarri da. Bartzokasen gizonek norgehiagokaren erritmoa berreskuratu eta hamabi puntuko aldearekin iritsi dira atsedenaldira (45-33).
Matt Costelloren hiruko batekin abiatu da bigarren zatia. Defentsan gehiago estutuz, talde arabarrak Olympiakosen saskiraketak galarazi ditu eta aldea murriztea lortu du. Etxekoek ez dute barkatu eta diferentzia hamar puntura eraman dute. Howardek erdietsitako bigarren lau puntuko jokaldi batek partidan sartu du Cazoo Baskonia. Laurdenaren azken txanpan lortutako saskiraketen ondorioz, talde greziarra hamaika puntuko aldearekin iritsi da azken hamar minutuetara (66-55). 6 eta 0-eko partzial batek, Joan Peñarroyaren hutsartea eragin du. Saiatu bada ere, talde arabarrak ezin izan du Olympiakos gainditu (86-78).
Porrot honen ondoren, Bayernen eta Zalgirisen partidaren zain gelditzen da Cazoo Baskonia. Lituaniarrek neurketa galtzen badute, PlayOff-etarako txartela lortuko lukete Joan Peñarroyaren gizonek.
