Euroleagueko fase erregularra amaitzeko Buesan jokatu duten hiru partidetatik lehena irabazi dute Joan Peñarroyaren gizonek
Zaleen aurrean garaipen garrantzitsua lortu du Cazoo Baskoniak. Amaieraraino borrokatutako partidan, Joan Peñarroyaren gizonek izaera erakutsi dute Alba Berlin gainditzeko. 21 puntu, 11 asistentzia eta 38-ko balorazioarekin eta 23 puntu, 10 errebote eta 40-ko balorazioarekin, Darius Thompsonek eta Maik Kotsarek norgehiagoka handia jokatu dute.
Parekotasuna nagusi izan da partida hasieran. Bi taldeak korrika egiten eta puntuak lortzen ahalegindu dira baina inork ez du lortu markagailuan aldentzerik. Cazoo Baskoniak aurrerapausoa eman du eta 12 eta 3-ko partzialarekin, hamar puntuko errenta lortu du. Israel Gonzalezenak ez dira atzean gelditu eta norgehiagoka berdintzea lortu dute lehen laurdenaren amaieran (25-24). Talde arabarrari kosta egin zaio erritmoa berreskuratzea eta hori baliatu du Alba Berlinek markagailuan aurretik jartzeko. Aurkariaren defentsa onak gasteiztarren saskiraketak galarazi ditu eta alemaniarrek aldea handitu dute. Azken minutuetan gehiago asmatuta, gasteiztarrak lau puntuko desabantailarekin iritsi dira atsedenaldira (44-48).
Aldageletatik bueltan, Joan Peñarroyaren gizonek beraien erritmoa berreskuratu dute eta markagailuan aurretik jarri dira. Baskoniako jokalari ohi Jannick Wetzellen saskiraketa batek puntu bateko aldea eman dio Berlineko taldeari azken hamar minutuei begira (68-67). Arabarren defentsa onak aurkariaren saskiraketak galarazi ditu laurdeneko lehen minutuetan. Alemaniarrak baina, suspertu egin dira eta markagailuan aurretik jartzea lortu dute, Joan Peñarroyaren hutsartea eraginez. Izaera erakutsiz, zaleen aurrean garaipen garrantzitsua erdietsi du Cazoo Baskoniak (93-87).
Talde euskaldunak bere hurrengo neurketari begiratzen dio. Fenerbahçeren aurka, beste hitzordu garrantzitsu bat izango du ostiral honetan (20:30). Playoff-etako postua lortzeko, beste garaipen bat lortzen ahaleginduko dira Joan Peñarroyaren gizonak. Astea, Endesa Ligako jardunaldi berri batekin itxiko du talde arabarrak. Igandean (20:00) Valentzia bisitatuko du txapelketako lidertzan mantentzeko helburuarekin.
